Udhëzues për Frog dhe kafenë tuaj

Udhëzimet për Frog mbështeten te manuali zyrtar i Didiesse (PDF). Ndiqni dokumentacionin që shoqëron modelin tuaj dhe na kontaktoni nëse keni paqartësi.

‍

Përpara përdorimit të parë

• Vendoseni aparatin në një sipërfaqe të sheshtë dhe të thatë, larg ujit dhe burimeve të nxehtësisë.
• Uji. Hapni kapakun e ndarjes së shishes, vendosni një shishe uji të pijshëm pa gaz, në temperaturë ambienti (deri në 2 litra), dhe futni tubin thithës brenda saj. Mbylleni kapakun.
• Ndezja. Shtypni butonin e gjelbër. Drita portokalli ndizet ndërsa aparati ngrohet dhe fiket kur është gati. Koha ndryshon sipas temperaturës fillestare.
• Shpëlarja. Rekomandojmë të kaloni dy-tri gota ujë pa bustinë përpara kafesë së parë, që qarku të mbushet me ujë.

Kujdes: mos e ndizni kurrë aparatin pa ujë dhe mos përdorni ujë të nxehtë ose lëngje të tjera.

‍

Si përgatitet espressoja

1. Prisni që drita portokalli të fiket.
2. Ngrini levën anësore dhe vendosni një bustinë ESE 44 mm në folenë e saj. Dy bustina bllokojnë aparatin.
3. Ulni levën derisa të dëgjoni klikimin. Mos e lëvizni levën ndërsa del kafeja.
4. Vendosni filxhanin dhe shtypni butonin portokalli. Aparati nuk ka dozë të programuar: shtypeni përsëri kur filxhani të mbushet sa doni.
5. Prisni disa çaste, ngrini levën dhe hiqni bustinën. Mos e lini bustinën e përdorur brenda: dëmton gominën.

Këshillë: ngrohni filxhanin paraprakisht, që kafeja të ruajë më mirë temperaturën.

‍

Pastrimi dhe dekalcifikimi

Pastrimi

• Vetëm me aparatin të ftohtë dhe të shkëputur nga rryma. Përdorni një leckë të butë e të lagur; pa tretës, alkool ose sfungjerë gërryes. Mos e zhytni kurrë në ujë.
• Tabaka. Zbrazeni dhe lajeni çdo ditë; mund të lahet edhe në enëlarëse.
• Mbajtësi i bustinës dhe filtri. Çdo javë: zhvidhosni dadon nën grykë, ngrini levën, nxirrni mbajtësin, hiqni filtrin prej çeliku nga pjesa plastike, lajini të dyja dhe montojini përsëri.

Dekalcifikimi çdo 3–4 muaj

• Përdorni dekalcifikues të përshtatshëm për aparate kafeje, sipas manualit të Didiesse. Për hollimin dhe kohën e veprimit, ndiqni udhëzimet e produktit.
• Ndiqni ciklin e dekalcifikimit të përshkruar në manual dhe në etiketën e dekalcifikuesit.
• Në fund shpëlani duke kaluar rreth 1 litër ujë të pastër.
• Asnjëherë uthull. Dëmet nga gëlqerja për mungesë dekalcifikimi nuk mbulohen nga garancia.

‍

Zgjidhja e problemeve

• Pompa bën shumë zhurmë. Shishja është bosh: mbusheni ose ndërrojeni.
• Kafeja del e ftohtë. Keni shtypur butonin ndërsa drita portokalli ishte ende e ndezur. Prisni që të fiket.
• Leva nuk mbyllet. Bustina është vendosur keq: ngrini levën, rregulloni bustinën dhe provoni përsëri.
• Kafeja del shpejt dhe pa krem. Bustina është e përdorur, ose kafeja është e bluar trashë apo e vjetër: vendosni një bustinë të re.
• Nuk del kafe ose del pikë-pikë. Ujë i pamjaftueshëm ose grykë e bllokuar: mbushni shishen dhe kaloni pak ujë pa bustinë.
• Del avull nga foleja e bustinës. Leva nuk është mbyllur plotësisht ose aparati ka gëlqere: mbylleni levën deri në klikim, përndryshe dekalcifikojeni.
• Rrjedh nga anët e mbajtësit. Mbajtësi i vendosur keq ose gomina e ndotur a e konsumuar: pastrojeni ose ndërrojeni.
• Bustina del e lagur. Vendosni një nga distancuesit që vijnë me aparatin nën mbajtësin e bustinës, pasi të keni kontrolluar gominën. Nëse vazhdon, gomina e poshtme duhet ndërruar.

‍

Garancia dhe kthimi

• 24 muaj garanci e prodhuesit për defekte të prodhimit, materialit dhe punimit. Për servisin e aparatit në përdorim, na kontaktoni.
• Garancia nuk mbulon dëmet nga gëlqerja, mungesën e dekalcifikimit, pjesët joorigjinale, ruajtjen nën 0 °C dhe përdorimin e bustinave jo ESE 44 mm.
• Kushtet për kthimin e aparatit në përdorim i sqarojmë para marrëveshjes. Për kthime, defekte ose produkt të gabuar, shihni kushtet e porosisë dhe na kontaktoni me referencën tuaj.
• Për çdo problem, na telefononi në +383 44 787 222 ose na shkruani në WhatsApp.